இதனைக் கருத்தில் கொண்டு வட்டார அளவில் 385 தானியங்கி வானிலை மையங்களை நிறுவுவதற்காக தமிழக அரசு தேசிய வேளாண் வளர்ச்சி திட்டத்தின் கீழ் 29.83 கோடி வழங்கியுள்ளது. முதன் கட்டமாக 2007 - 2010ம் ஆண்டுகளில் ரூ 16.90 கோடி செலவில் 224 தானியங்கி வானிலை மையங்கள் மற்றும் 2011 - 2016ம் ஆண்டுகளில் ரூ 12.94 கோடி செலவில் 161 தானியங்கி வானிலை மையங்கள் நிறுவப்பட்டன. தமிழ்நாடு வேளாண்மைப் பல்கலைக்கழகத்தின் பயிர் மேலாண்மை இயக்கத்தின் கீழ் இயங்கும் வேளாண் காலநிலை ஆராய்ச்சி மையமானது வேளாண் துறையோடு இணைந்து தமிழ்நாடு வேளாண் வானிலை இணையதளத்தினை உருவாக்கியுள்ளது. இதில் பகல் நேர மற்றும் இரவு நேர வெப்பநிலை, மழை, காற்றின் ஈரப்பதம், காற்றின் வேகம் மற்றும் திசை, மண்ணின் ஈரம் மற்றும் வெப்பநிலை, இலையின் ஈரம், சூரிய ஒளி நேரம் மற்றும் சூரிய ஒளி அளவு போன்ற 11 வேளாண் வானிலை காரணிகளை ஒரு மணி நேர இடைவெளியில் 385 தானியங்கி வானிலை மையங்களிலிருந்தும் சேகரிக்கப்பட்டு “tawn.tnau.ac.in” என்ற இணைய முகவரியில் உடனுக்குடன் பதிவிடப்படுகிறது. இவ்விணையதளத்தில் தினசரி, வாராந்திர மற்றும் மாதாந்திர வானிலைக் காரணிகளை வட்டார அளவில் அனைவரும் இலவசமாக பார்க்க இயலும். இதனை உள்ளிடாக எடுத்துக்கொண்டு உலகளாவிய வானிலை முன்னறிவிப்பு விபரங்களுடன் இணைத்து அடுத்த ஆறு நாட்களுக்கான மத்திய கால வானிலை முன்னறிவிப்பானது தினசரி வழங்கப்படுகிறது. இந்திய அளவில் இத்தகைய அடர்த்தியான வானிலை வலைபின்னலானது தமிழ்நாடு வேளாண்மை பல்கலைக்கழகத்தால் முதல் முறையாக நிறுவப்பட்டு சிறப்பாக செயல்பட்டு வருகிறது. இந்த தகவல்களைக் கொண்டு வேளாண் அலுவலர்கள் வட்டார அளவில் வேளாண் அறிவுரைகள் வழங்க இயலும். மேலும் வானிலைத் தகவலுடன் தொழில் நுட்பவிஞ்ஞானிகளின் அறிவுரைகளும் கிடைக்கப்பெற்றால் வேளாண் பணிகளை சிறப்புறச் செய்ய இயலும்.

இதனைக் கருத்தில் கொண்டு தமிழ்நாடு வேளாண் வானிலை இணையதளத்தில் அடுத்த முயற்சியாக இந்திய அளவில் முதல் முறையாக தானியங்கி வானிலை சார்ந்த வேளாண் அறிவுரையானது விவசாயிகளின் அலைபேசிக்கு குறுந்தகவலாக அனுப்பப்படும் சேவை தொடங்கப்பட்டுள்ளது. இதற்காக தமிழக அரசு, தேசிய வேளாண் வளர்ச்சி திட்டத்தின் கீழ் ரூ 3.50 கோடி நிதி வழங்கியுள்ளது. இந்த சேவையில் கடந்த கால, நிகழ் கால மற்றும் எதிர்கால வானிலைகளைக்கொண்டு வேளாண் காலநிலை ஆராய்ச்சி மைய விஞ்ஞானிகள் உருவாக்கியுள்ள 54 வானிலை சூழல்களில், 108 பயிர்களின் 5 வளர்ச்சி பருவங்களுக்கு தேவையான வானிலை சார்ந்த வேளாண் அறிவுரைகள் இவ்விணையதளத்தில் பதிவு செய்துள்ள விவசாயிகளுக்கு அவரவர் பயிர்களுக்கு பயிர் விதைப்பு தேதியினை அடிப்படையாகக்கொண்டு அலைபேசிக் குறுந்தகவலாக தமிழ் மொழியில் தானியங்கி வானிலை சார்ந்த வேளாண் அறிவுரை (AAS) மென்பொருள் மூலம் அனுப்பப்படுகிறது. இந்த தகவல்களை அலைபேசியில் நேரிடையாக பெறுவதற்கு அலைபேசிச் செயலியும் உருவாக்கப்பட்டுள்ளது.

தமிழ்நாடு வேளாண்மை பல்கலைக்கழகத்தின் தமிழ்நாடு வேளாண் வானிலை இணையதளம் (TAWN) மற்றும் தானியங்கி வானிலை சார்ந்த வேளாண் அறிவுரை (AAS) மென்பொருளானது விவசாயிகள் தங்களது சூழ்நிலை மற்றும் பயிருக்கேற்ற அறிவுரைகளை சரியான நேரத்தில் பெற்று நல்ல விளைச்சல் மற்றும் இலாபம் பெறுவதற்கும் இரண்டாம் பசுமை புரட்சியினை நோக்கி செல்வதற்கும் உதவிகரமாக இருக்கும் என்பதில் ஐயமில்லை.